十級風劫The Hurricane Heist影評　　唔係大製作但睇得好爽

入場之前其實對十級風劫冇乜期望，又唔係大卡士又唔係頂級特技，應該唔會好睇得去邊，不過見到佢個劇情係趁住打大風去做世界，都幾得意，於是又即管入場睇吓有幾特別！

故事一開始，就講到明有成班智慧型大盜，想劫走美國國庫內6億美金，咁大壇嘢，梗係要計盡天時地利人和啦！地利就係一早摸熟晒國庫成個保安系統，人和就串埋晒國庫重要員工同鎮內嘅所有警察，係所有！天時就係等個超級颱風，吹到唔可以搵其他地方警察同軍隊幫手，嘩，咁仲唔係玩晒？

點知就係咁啱有一對兄弟，其中一個仲係研究氣象嘅博士，連同埋其中一個正義嘅國庫員工，一齊借住個風玩晒啲賊轉頭，有幾場戲真係睇到我好開心，因為真心緊湊同埋都幾誇張，其他電影嘅主角唔怕死我都覺得有啲可能，但當個風吹到人都飛得起，但果幾個正義嘅主角都完全唔驚，繼續靠住個風同啲賊死過，好神化！

成套戲最重要的主角，係曾經演出救參72小時做Liam Neeson個女嘅Maggie Grace，佢叫做多啲發揮，其他人都係忠奸分明，一企出嚟你都估到對白果隻。不過我仍然覺得十級風劫好值得入場睇，雖然冇乜影評講HK Movie又低分，劇情又有唔少犯駁位，但睇得出係有心機拍同埋劇情好緊張，中間冇乜厠所位，個人覺得係近幾個月少有咁精彩嘅電影，好過好多雷聲大雨點少嘅大製作。