犬之島Isle of Dogs電影影評  香港人睇特別有feel

0

四年前睇《布達佩斯大酒店》嘩一聲叫咗出嚟,乜有人咁拍戲嘅,唔單只故仔好得意,好多個畫面好似拍廣告咁靚,果陣已經好留意鬼才鬼才導演Wes Anderson,最近入場睇咗佢嘅新作《犬之島》,更加嘩咗好多聲,拍得好靚風格好特別,裡面帶出嘅反抗腐敗訊息,真係好中香港人呀!

笑中有淚啱香港人

講幾句個故事先,話說二十年後日本狗隻太多,市長頒佈緊急法令將所有狗流放到垃圾「犬之島」但後來有人到島上想找回愛犬,開始發覺成個計劃,原來都只係國家陰謀。你可能會話乜又係啲「陰謀」論,唔好怪我,因為當個政府乜都講大話搵你笨仲有乜就例牌硬撐果陣,你一有事就一定會諗起「陰謀」,咁所以呢套《犬之島》應該都會睇到香港人好投入,因為當中個政府嘅動作,好似高舉大義去消滅小眾,用盡國家機器去對付你,我哋應該唔會覺得好陌生。不過始終係一套動畫,所以當中嘅意思只係會用詼諧手法表達出嚟,你笑笑下又會覺得原來我哋真係好可憐!

濃濃的日系風格

知道知道,你都係想息事寧人睇套戲啫,唔好講政府好唔好呀?都OK呀,Wes Anderson呢套動畫真係好認真製作,為咗捕捉狗狗最真實嘅神態,劇組帶咗幾隻狗仔慢慢觀察,最後製作咗500個人仔同500隻狗仔,而為咗方便拍攝,每個角色又做咗5種唔同大小,真係唔怪得套動畫咁細緻。我睇完「
犬之島」即刻睇返佢嘅making of,真係覺得佢咃好認真,好多場景唔係電腦render出嚟,而係砌晒成個景當電影咁拍,再加後期電腦特效,同PIXAR果種認真,又係另一個境界。

Wes Anderson話呢套戲係向日本名導演致敬,所以成套戲都發生喺日本,而且動畫係用日系方式表達,同外國主流動畫片好唔同,強烈建議鍾意欣賞靚嘢同唔鍾意政府衰嘢嘅朋友入場!

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More