in ,

無聲絕境A Quiet Place影評  蛋叉飯整得夠銷魂

冇錯,叉燒飯加隻荷包蛋咁大把,叫乜嘢「黯然銷魂飯」扮有型,不過《無聲絕境》就絕對唔係扮有型,佢用咗唔高嘅成本,拍咗套幾出色嘅電影,我一直都覺得,唔一定要用錢堆砌,先至係好戲嘅!

故事設定夠吸引

故事設定好特別,當時世界上出現一種怪獸,一聽到有物件發出聲響,就會很快出現並且進行襲擊,很多人類及生物已經因此致命。《無聲絕境》就係講一家人如何在這個環境下生活,於是最有趣的睇戲場面出現了,以前睇戲開晒手機又當喺屋企傾偈嘅觀眾消失了,因為套戲太靜,所以有少少拆紙袋聲都會好覺,所以變咗全場都冇聲,又或者大家都好‧細‧聲,呢個體驗你睇其他戲一定冇,所以建議你一定要入場睇,唔好等遲啲上網睇,我可以好肯定咁講,冇乜戲夠膽咁做!

好容易代入套戲

去到幾時有少少聲呢?係40分鐘,即係40分鐘你終於可以抖一抖氣!知道咗個設定之後,好多人會問:冇晒對白冇晒音效,好似做默劇咁有乜好睇?其實呢個就係佢設定得巧妙嘅地方,默劇係因為佢嘅表達形式唔可以有聲,而《無聲絕境》係劇情需要唔可以發聲,所以好多緊張位就係劇中角色唔覺意整咗少少聲出嚟,都要令到觀眾好緊張好投入,你會好容易代入咗套戲入面,諗到如何係我點算好呢!

個個角色都交足戲

另外每個角色都寫得唔錯,即使對白極少個人物都幾立體,男女主角John Krasinski同Emily Blunt都演得幾出色,而戲裡面做佢哋個女嘅15歲少女Millicent Simmonds亦交足戲,令成套戲加晒分。咁點解話《無聲絕境》係「黯然銷魂飯」呢?因為你會見到唔係咩大製作,幾個場境幾個角色拍晒,加埋啲怪獸都唔算係高成本,《13小時:班加西無名英雄》主角John Krasinski自編自導自演,肯定係慳住去拍,但出嚟反應真係唔錯,證明識煮嘢食同識拍戲一樣,多錢唔係大晒嘅!

記者:腦大

腦大,就梗係腦細個朋友,腦細就搞到公司越嚟越大,而腦大就只係搞到自己頭都大埋。