失驚無神自殺合約The Surprise影評　　題材有趣劇力稍弱

先講劇情，主角雅各繼承了一大筆財產，但卻生無可戀一心尋死，只是死極都死唔去，只好幫襯「自殺設計公司」的「失驚無神殺死你」服務計劃，包你一定死但唔知幾時死的驚喜。但簽約之後遇上同樣求死的心上人安妮，究竟係繼續想死定愛得要生要死？的確是命運弄人！

故事開得幾吸引，雖然之前都有電影用過類似橋段，但唔少朋友聽到個故事都覺得有趣，因為自殺一向是社會禁忌，而這套戲更加係要買套餐來整死自己，就更加將禁忌荒謬化！不過頭開得好個勢卻不能延續，到了中段開始有點沉悶，可能是太集中男女主角的感情生活，未能帶出簽錯約被人追殺的緊張效果，之後揭開女主角身份時，更令我O了咀，心諗個編劇唔通TBB出身，咁都被佢諗到。

演技方面其實男女主角Jeroen van Koningsbrugge及Georgina Verbaan都演得不錯，即使有的地方演得略為誇張，起碼我覺得選角是有眼光的。當然戲中另一個最搶戲分的，就是Jan Decleir飾演的園丁，出場的次數頗多，而且都是關鍵的時候，Jan的演技爐火純青，令到這套電影生色不少。

改編自荷蘭作家Belcampo短篇小說的《失驚無神自殺合約》，我不知是否跟足原著，故事性算是不俗，但導演似乎未能夠好好控制節奏，所以上半段比較緊張及有驚喜，到了中段就開始有些鬆散，部分地方更有「生安白做」的感覺，有點可惜。其實Mike van Diem本身都幾離奇，自從於1998年憑第一部作品《你死我亡》(Character)奪得奧斯卡最佳外語片後，就主力拍廣告，18年來再沒有拍電影，今次再出山拍電影，雖然欠缺火候，但仍是比一般的電影有新鮮感，少了那朕公式化的味道！