死侍：不死現身Deadpool影評　　主角賤但唔夠星爺賤

係我衰，睇完評語先入場，結果係高期望入場帶住失望離場，冇錯，我知套戲口碑唔錯，但未去到激讚，因為主角的所謂賤賤格格背後深情勁揪，星爺已經演繹過萬七次，今次由鬼佬去演，OK啦！

戲情雖然簡單但唔想太戲透，都係例牌介紹返主角背景，再來一個奸角OK了事！故事不算太高潮起伏，幾乎所有超級英雄都係呢套，特別在於用了打亂時序的方式忽前忽後，冇平鋪直敍咁悶，但Pulp Fiction已經將呢門絕招玩到出神入化，我只能夠覺得有誠意但絕非有創意。

超級英雄片點可以唔講特技，相比大家睇到爛的超爆特大特技場面，Deadpool就當然不可以相比，如果一心想睇特技的話你會覺得未夠喉。唯一特別的是主角Deadpool會突然對住螢幕說話，即是俗稱打破「第四面牆」，既然整套戲是玩搞鬼的，就索性好像動漫或電玩遊戲般，不必求真實感但求睇得開心，至於你受唔受這種演繹方式，就可以說是見仁見智，但無可否認是有新鮮感，值得一讚。

至於演員方面，不用我說大家也知道，主角Deadpool就是整套戲的靈魂，男星Ryan Reynolds是演得不錯，但因為長期都戴了面具，好不好笑夠不夠賤好多時都靠對白，對白好笑就好笑，未能反映Ryan Reynolds的演技。至於其他角色，都是任何人演都差不多的情況，尤其是奸角的奸位未夠明顯，最後一局「裝」Deadpool也不夠絕，實在有點浪費。不過香港人好耐冇睇賤精英雄了，與其睇Out了10000年的藍晶，與及從良的星爺作品，那Deadpool還是贏幾條街的！

[youtube url=”https://youtu.be/j2APnEim0lo”]