90歲老人家屋企上網得3Mbps嬲爆　　用1萬登報極速有人舖好光纖

香港不少地方都有光纖寬頻網絡，家居上網慢極有限，就算無都可以夾硬用4G或5G頂住，差極有限。唯外國地方大，光纖覆蓋仍然比想像中要差，其中一個重要原因，是當地ISP網絡商因為成本問題，又或相關區域人口太少「無乜得賺」而唔肯舖光纖網絡。美國一名90歲老人家Aaron Epstein正正面對如此問題，他家中雖然在洛杉磯荷里活北區North Hollywood，但家中僅得3Mbps上網。

由於遲遲未有光纖寬頻提供，他嬲爆決定用US$10,000在華盛頓郵報登廣告（下圖），刊出公開信俾AT&T CEO John Stankey，質問AT&T既然稱自己是通訊業的領導，但卻要令住在他區域的人失望。他提到，AT&T常賣廣告指他附近有光纖寬頻100Mbps，但他家中上網僅得3Mbps，並指競爭對手都做到200Mbps。事件曝光後，他接受一些傳媒訪問時，提到有時都無3Mbps，慢到喊咁話。

結果，AT&T CEO John Stankey即時打電話同佢傾傾，事件曝光一星期唔夠Aaron Epstein更正式有得用光纖上網，家中的上網速度就由3Mbps DSL狂升至300Mbps無限光纖寬頻，Aaron即時笑曬口。據稱，Aaron Epstein的鄰居都未有得用光纖上網，仍然要等12個月，AT&T才有可能正式為他的鄰居提供光纖上網服務。