有片:「我要攬炒」巴型爆宣言  反對大台、唔應該再分勇武與和理非

0

香港人已經奮戰了兩個月,數小時前在中環「英美港盟、主權在民」集會中,有不少人參與。曾協助眾籌向外國做「文宣」的連登網民「我要攬炒」,雖然沒有看到真身,但發表了一段相當感人的宣言,而且很有深度,值得大家一睇。當中提到,攬炒巴反對大台,若果他將來是大台一部份,攬炒巴希望大家拉他下來。

攬炒巴提到,香港很多高官和保皇黨都有外國護照,他們都是扮取消,日後補領,攬炒巴十分不滿,希望出手令他們無得走,生生世世做一個大灣區的人。他認為香港人只要善用國際思維,拒絕迷信大台模式,唔割蓆,唔棄餒,就一定會贏。攬炒巴亦很反對大台,希望大台的人有新思維去抗爭,並提醒大家若攬炒巴成為大台一部份,大家要幫手拉他下來。

有網民剪了宣言相關部份:

以下是蘋果日報直播片段中「我要攬炒」巴宣言部份,質素則較清晰:

有連登網民細心製作成文字版,內容如下:

大家好,我係「我要攬炒」,好多謝大家出席呢個晚會,大專學界嘅集會結語係向國際發出呼籲,而我攬炒,會以一個普通人身份向香港人致謝,表達少少對前路嘅睇法,更多謝英國國會議員拍片支持香港。

到底點解我會叫自己做「我要攬炒」呢,其實源於六月九號當日,我發現幾乎所有香港政府高官同保皇黨都有外國護照。佢哋只係假放棄外國護照一次,就享有肆意出賣香港利益嘅權力,與民為敵。

賣港之後,啲官同保皇黨就手執外國護照一走了之,所以,我要取消佢哋外國護照嘅重發權,等佢哋身身世世留喺大灣區,共享大灣區榮耀,同佢哋攬炒。

不知不覺間,香港人已經奮戰咗兩個月,呢兩個月有三個時刻令我特別感觸同決定奮戰落去,同大家齊上齊落。

第一個時刻,六月十號見到有年青人絕望地回應當權者
「反正都冇未來,不如一鎗啪死我」

第二個時刻,係七月一號,梁繼平義士同大家講
「我哋今次一輸,就係輸十年」

第三個時刻係七月廿八號,元朗有義士嘅盾牌畀子彈射穿,記者問佢點解仲堅持,義士好堅定咁回答
「光復香港,時代革命」

呢三個時刻,反映咗香港人逐漸將絕望嘅心情,轉化為無比勇氣,對抗暴政。

呢一刻,可能我哋覺得好疲倦,好憤怒,好氣餒,但係我哋唔可以放棄,因為呢個光復香港,時代革命嘅最後機會。

「光復香港,時代革命」唔係一句空洞口號,更加唔應該畀人用嚟分化我哋。

因為「光復香港」指嘅係光復香港嘅自由,人權,民主,資源自主同國際定位。

而「時代革命」嘅意思係聲稱五十年不變嘅時代之中,由香港人一齊由下至上撼動政權,改變政治體制。

學術上,只要社會大眾,嘗試由下而上令政治體制有變化,就係革命。所以,2014年係革命,2016年係革命,2019年都係革命。

1984年至今35年,香港人不斷退讓,抱薪救火,最終導致退無可退。

對我哋後生一輩嚟講,與其2047年默默死去,倒不如趁香港尚有一絲希望嘅情況用盡最後一口氣,創造未來。

有年長一輩問,到底我哋後生嘅有冇勇氣將抗爭交返畀傳統大台領導,我不禁反問,傳統思維一輩又有冇勇氣,放棄三十年來嘅模式,放手畀我哋手足以新思維,新方式改寫香港命運?

當年青人日以繼夜,夜以繼日,以不同方式向政府施壓嘅同時,但願我哋回過頭來,會見到年長一輩,企喺現場,默默支持我哋。

年輕人需要嘅唔係金錢,唔係食物,而係活生生嘅人願意走出嚟支持。

今日之所以邀請不同光譜,不同年齡層嘅人仕上台,就係為咗向全世界展出,無論香港情況幾嚴峻,香港人都唔係因為政治理念,年齡不同而廢言,割蓆。無論有幾多風波,我哋依然團結,為我哋嘅訴求奮戰到底。

由今日起,我哋唔應該再分勇武同和理非,出得嚟嘅就係手足,係抗爭者,用核彈都唔會割蓆。

我必須強調,大專學界同攬炒都有同樣信念,就係拒絕大台。如果有大台出現,我會出全力摧毀佢。假如有一日,我成為大台一部分,請大家一視同仁,將我拉落嚟,拆我台。

只要拒絕迷信大台模式,唔割蓆,唔棄餒,善用國際思維,我哋香港人一定會贏。

「香港人,寧化飛灰,不作浮塵,光復香港,時代革命!」

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More