實試:給肥佬黎的公開信  頂你個肺咩!俾錢都搞到咁複雜!

0

作為半個IT人,半個記者,都好明白新聞網站要搞收錢,都唔好話有無人肯俾錢,淨係講技術已經夠難。雖然話蘋果日報係全香港最敢講的傳媒,但佢地近排推行收費後,唔講幾咁少人肯俾錢,淨講佢個設計,真係完美示範咗全世界最差嘅付費系統。肥佬黎,呢舖我撐你呀,但唔該可唔可以整好少少?唔識整搵我地啦,我地上黎免費幫手好無?求下你地蘋果日報唔好整到咁痴線。

第一:app入面淨係話我未升級,即係做乜春?

你問我地,當然知你咩意思。但唔係每一個讀者都係IT狗,睇見左面呢個情況,淨係會知「無得睇」,根本唔知下一步點搞。你可能會話,肥佬黎唔想俾蘋果或者Google抽水,所以唔想係入面加內建購買功能。我地明嘅,但好多網民都提出,你可以把Google Play或蘋果App Store直接㩒購買功能嘅人,收番貴少少抵銷個成本,但簡單化成個過程。阿婆阿伯唔駛煩到後生,㩒個掣俾錢就買到。

就算肥佬黎你死都唔肯咁做(我地明嘅,又係咩驚marketing訊息亂呀嘛⋯),但你最少係個提示個粒字,同埋會員資料個版(上圖右)加番啲提示或連結,等人㩒入去可以知道,「呀,原來我未俾錢所以睇唔到」。


 
第二:識用電腦都亂到仆街

咁你可能會反駁,話其實好多阿伯阿婆都識用電腦。我地都唔會學肥佬黎你咁痴線,係主網站登入後,㩒完升級彈多個教學視窗,然後再㩒又再彈多個。最弊彈入去之後我之前明明登入咗,又要再登入多次,都唔知想點。我識用電腦都覺煩啦。我明嘅,你想俾大家清楚點俾錢嘛?但唔該唔好學大陸淘寶㩒一條link就開新視窗啦。

 

 

第三:去到俾錢都唔知想點

我地都叫係行家,我地好明白你點解要整同意條款,同埋下面問讀者係咪歐盟國家居民。歐盟國家居民而家有個所謂GDPR保障,網站要用相關居民任何的私隱資料,就算只係個名都一定要講清楚用黎做乜。咁我明蘋果日報資源無乜,唔知點樣避咗唔好中伏,但其實咁樣我唔剔,又去唔到下一步。其實最好都係旁邊加條link,等人知做乜鬼先得嫁。

 

 

第四:俾完錢要睇仍然極煩

我明嘅,我地俾咗錢其實已經得。不過咁,若果入蘋果日報app揀會員專區,揀果燃台,居然唔係app入面開,而係要彈出去Safari。彈出去都算,亦即係要登入多次,真係好惡搞。我地熟玩手機就話,阿婆阿伯㩒下㩒下,你又彈黎彈去,登入黎登入去,佢地會唔知做乜。唔好乜都靠曬後生仔,叫佢地教,其實好多阿婆阿伯唔想煩住啲後生,咁肥佬黎你班同事做嘅精彩報道,又睇唔到啦!

你幾唔鐘意都好,香港就係Facebook主導。有時見到蘋果日報嘅新聞連結,一㩒打開都係Safari,就算係其他app見到都係入Safari,亦即巿上面係咁要重複登入嘅麻煩。其實一早就有齊所謂deep link或universal link技術,大家㩒連結直接去番個app,睇嘢都方便好多,唔係打開個瀏覽器去網站咁煩。好似連登和親中大媒零壹都用咗好耐,iOS和Android都唔會有問題,唔明點解蘋果日報唔做。有少部份熟IT嘅人可能覺得「你逼我用app唔得喎」,但肥佬黎你要照顧大圍先嘛!

今次就寫住咁多先,因為其實要執都有排執,肥佬黎搞番掂啲基本嘢先啦,唔好令大家失望呀!

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More