笑乜鬼Big Big Channel　　你班香港人咪又係睇到出曬水

雖然無綫電視的收視一直下跌，但跌極有限，其實有好多人都好鐘意睇。琴晚小編本來唔知發生咩事，但好在身邊有好多真香港人，好鐘意睇無綫，一邊不停批評無綫新出的app Big Big Channel。結果，小編發現，又一如所料，香港人愈罵愈愛睇，Big Big Channel極速衝到App Store第一位。

嚴格黎講，Big Big Channel推出其實都有一段時間，據稱無綫成日係節目度提（唔好意思，小編唔係真。香港人，話唔睇無綫就真係唔睇），本身下載量都有一定數目。有人以為無綫因為琴晚要直播，所以叫大家下載，但又暫時唔俾大家登記咁話。其實，winandmac小編調查過，係節目前幾日，就因為呢隻app太受歡迎伺服器曾多次爆棚。你可以笑無綫唔掂，但你又有無諗過，就係因為無綫呢隻app掂，先至會爆伺服器？
[the_ad id=”41111″]
你可以話無綫公器私用，你可以話Big Big Channel只係會紅一陣唔持久，但我地睇番轉頭，myTV SUPER好多人話佢作數，但事實上係愈黎愈多人用，myTV SUPER app一直係下載排行榜頭十名內。你睇下身邊啲人，好多會同你講，「我要睇beIN SPORTS呀，咁都要用myTV SUPER嫁啦，無法」。一句超Typical的香港人回應，尤如「搵食者，犯法呀」一樣，如此響亮，如此「合理」。點解唔諗下，睇少場波，落實地去杯葛無綫？

無論無綫點衰格點唔掂，佢地都唔係傻仔。佢地明知自己都係有一定影響力，佢地明知香港人都係邊罵邊睇，盡快推出多啲唔同嘅新媒體apps，吸咗你班用戶先，到最尾都係無走出佢地嘅世界。你旨望香港人真係會杯葛到無綫，真係令佢地驚而去改變？唔好玩啦，香港人咁認命，根本係俾無綫永遠控制。