阿鬼
最近csl.因為蘋果一篇測速報道包尾，嬲到搞了一個全港速度大測試。結果雖然夠話題性，但最後引起其他對手包括數碼通和3香港不滿，兩間台分分暗示測試不準確兼做手腳。其實，香港一直都有這個奇怪問題，乜都要快，但沒有想最重要的，其實是無限才是重點。
仔細一看蘋果日報原報道，就算包尾的csl，所謂最慢的下載都達14.3Mbps，基本上足夠應付串流高清影片有餘，在手機上做乜都得了。平時就算要接駁電腦分享上網，基本上超過8Mbps速度已經可以應付一般需要。相反，csl.的6GB收費計劃並不便宜才是重點。
參考美國近日Verizon、T-Mobile推全新的無限數據計劃，都不是以速度行先，反而是主打功能為先。例如美國當地電訊商通常限制串流影片，Verizon就打頭陣讓大家可以無限制地串流高清影片，睇得更清楚。他們以往在電話分享至電腦上網的限制亦減低，務求讓用家能活用4G LTE做到更多，從頭到尾都不是比併速度。
[the_ad id=”41111″]
假如我是csl.的市場推廣經理，我不會花大錢做速度測試，反而會向美國這些電訊商近來的推廣計劃中偷師，大唱「速度不等於一切，做到啲乜先係最重要」的推廣，然後稍為把價錢降低，甚至乎學足T-Mobile推一個月費計劃，有無限數據、任用、狂睇片等，令自己變得更抵玩。
我們經常都說，現時影片內容成主導，得6GB數據就住就住根本不過癮。簡單一句，你俾我真的能每秒下載450Mbps又點？一日唔夠用曬啲數據有鬼用咩！
