阿鬼
本來改版之後，唔係好想出抱怨文。不過呢，Facebook呢個發佈平台，係史上最垃圾同最仆街嘅，我地忍咗呢個平台好多年，若果唔係香港人死都要痴住個Facebook，我地真係一篇文都唔想放上Facebook。
Facebook成日話鼓勵媒體百花齊放，事實上發展咗咁多年，對於中小傳媒的支援（尤其香港）的支援真係差到爆炸。我地winandmac唔敢講話自己做得好好，但最少都叫做有心放多啲內容上Facebook。但大佬，放足咁多年，一啲支援都無，Facebook根本當中小傳媒係免費勞工，要我地得個做字，然後自己走去賣廣告，0.01廣告費都唔x分俾你，話知你死，最離譜叫中小傳媒俾錢賣廣告。作為美國咁大間公司，話就話支持言論自由，其實一啲都唔係，只支持大機構。忍咗咁多年，我地winandmac唔出聲唔係人。
你試諗下，若果有一日你老闆連糧都唔出俾你，仲叫你俾番錢佢，因為佢教咗你嘢。作為和平理性有上進心的香港人，可能第一第二次會受，但幾年之後都仲係咁，仲點同你做。
[the_ad id=”41111″]
好多香港人又會話：咪抱怨咁多啦，做好啲內容咪得囉！面對！You Know。你就真係You Know你個頭，今次唔講假新聞網站啦，其實就算所有大傳媒都係無恥地不停偷片偷圖，就幾廿萬個Like，Facebook就會話佢地有影響力，俾勁多Reach（即觸及人數）。最離譜係Facebook完全無處分制度，呢啲大傳媒偷完片偷完圖，繼續Reach數勁升，藍剔認證繼續有，如此垃圾的Facebook平台，仲可以係邊度搵到？
Facebook之前話推出咗廣告Network，好似Adsense咁話俾人賺下錢。結果，個個Facebook Ad Network又係大傳媒玩意，之前我地收到通知，講到明佢地最終決定只係俾大傳媒用咁話。作為讀者嘅你可能會問：咁又點？即係話Facebook獨有的Instant Articles，我地要繼續用嘅話，係連0.0001都賺唔到，因為Instant Articles講到明只能用Facebook Ad Network。咁，即係又叫我地白做。
有時唔係話唔想做多啲內容，但成日要人白做的Facebook，真係好仆街。佢地根本只係掛住幫大傳媒，或者肯俾錢佢嘅傳媒，搞到係社交網絡分享的內容，根本係俾大傳媒操控曬。中小傳媒愈黎愈難Reach到讀者，一蚊都無機會靠Facebook賺到，永無生存之日，逐間等住死，惡性循環，雞與雞蛋嘅問題。搞到Facebook永遠都係得一個方向的文章、又或者係俾某幾間傳媒控制住嘅方向的文章，先俾人見到。與其係度同人講，話有心解決假新聞問題，不如先真心聽下中小傳媒意見，Facebook而家根本同689一樣無分別。
利申：我地已經搵過香港Facebook好多次投訴有關問題，不過，當然，又係無人聽。我地唔寫紫薯又唔偷片偷圖，邊有人理。
