阿鬼
53歲的湯佬又瞓身演職業特工隊，呢個牌頭就好似Rocky、Terminator咁，只要一日有湯佬，一日都會拍下去。尤其是今次的大場面又多又密，絕對可以睇到你飽住走！
簡單兩句劇情，職業特工隊面臨解散，阿頭亨特卻發現一個神秘組織Syndicate正在暗中運作，不但要消滅職業特工隊，更希望奪得巨款，招兵買馬改變世界，湯佬伊頓決定要查出神秘組織的內情。這個是什麼劇情基本上都不重要，總之就係要串連到一幕幕場境，讓湯佬上天下海打餐飽。
如果對職業特工隊有些感情，單是睇湯佬的動作都值回票價，電影宣傳中指好多動作都係零借位零替身，例如一開場湯佬攀在起飛的飛機上，就唔係藍幕key上去而是在飛機上真拍！講真，我又唔係睇緊成龍既A計劃，湯佬又真係唔使咁博命，始終以現時的特技，絕對可以做到好好睇睇，如果次次都要咁博命，仲點樣拍第6,7,8集。
2個鐘有幾多時間係冷場？幾乎搵唔到，所有事件都好密集，場境設定都好有心思，例如公路、歌劇院、街頭等等都好有心機「度」足觀能刺激，如果你要求的是緊湊密集的觀感享受，今次呢部職業特工隊：叛逆帝國完全交足功課，比起上一集《鬼影約章》似乎更加吸引。
講下劇中的其他角色，無論是飾演助手Benji的Simon Pegg，還是女主角Rebecca Ferguson都好有心機演出，不過劇本就真的有點弱了，沒有機會讓他們有更多發揮。基本上除了湯佬之外，其他人都面目模糊，我知道職業特工隊主要靠湯佬食糊，但其他人(尤其係奸角)都表達唔到有幾強的時候，那湯佬就似乎在演獨腳戲，一個人威晒！
[youtube url=”https://youtu.be/jXYTRxxg0zo”]
