阿鬼
Captain America: Civil War《美國隊長3：英雄內戰》，一睇呢個戲名，講到明就係大家圍埋唔理三七廿一打鑊甘，上次的《復仇者聯盟2：奧創紀元》人頭湧湧，但完全係亂打，加上群揪與群揪之間剪接太快太亂，各大英雄的出招又沒有明顯分別，完全係失敗。今次可說是吸取教訓，即使只睇十多分鐘的大戰，已經值回票價！
講得太誇張？睇開Winandmac影評的朋友，都知筆者有電話碗有碟話碟，群揪戲最難係各有特色同節奏明快，《美國隊長 3：英雄內戰》粒粒巨星，今次更加入黑豹、蟻俠和蜘蛛俠，牌頭都已經係贏幾條街。留意返，好多時群揪戲都係幾個打一個大佬，大佬無論幾勁但模式都會好似，好無癮！今次係英雄互打，就好似你打機揀唔同英雄，各自有絕對互相制衡咁，睇落係有feel好多。
未講劇情之前，都係講多幾句精彩的群揪大戰，新加入的新角色如蟻俠和蜘蛛俠，可以說是搶盡風頭，即使飛隼及鷹眼等原本屬二線的英雄也加了不少戲份，各人的表現都平衡得很好，唔會一面倒，在整個場面處理上花了不少心思，熱鬧之餘也有不少笑位，絕對是史上最好睇的群揪戲，沒有之一。
講到果場15分鐘戲咁正，整套戲148分鐘都點樣樣？講返個大故仔，要鋪排點解英雄陣營會內戰，個原因有點老土，但都OK講得通，唔會牽強到你覺得唔講好過講。今集兩大主角是美國隊長同Iron Man，Iron Man仍是一路以來的硬頸固執性格，而美國隊長則係正氣到不食人間煙火的靚仔，兩個本來都好難擦出火花，但透過寒冬戰士與兩人的恩怨，成功讓美國隊長同Iron Man打到甩肺，鍾意這兩個角色的朋友，今集絕對可以睇到飽住離場！
筆者認為《美國隊長 3：英雄內戰》是近年英雄片的佳作，劇情及打鬥場面都有水準，也沒有了以往打到成個城市爛晒收唔到科的荒謬感覺，回歸到恰如其份的特技畫面及近身搏擊，等觀眾重新看到當中的畫面設計及有趣的細節，這個是之前一味狂打爛打喪打不能相比的，看完這一次首映，筆者即時想買飛再看第二次，對於平時看慣戲又奄尖聲悶的我，確係難得！
