阿鬼
特朗普政府上場後，時常彈出彈入，當初競選的承諾往往只靠旗下的媒體老吹作大。先講俄烏戰爭，最初承諾上任後24小時內搞掂，正常人當然都知道可能有誇大，小編當然理解根本無可能24小時內搞掂，亦不會因此而對特朗普不滿。但是，現在的情況是，特朗普政府正放棄促進俄烏和平。他們於4月18日在白宮表示，如果任何一方令談判變得非常困難，美國將會選擇「唔再理會」 。國務卿魯比奧（Marco Rubio）早前亦有類似警告，即如果停火談判冇進展，美國將停止參與。亦即是說，根本係搞唔掂。最離譜係，美國至今仍然主張烏克蘭放棄俄羅斯侵佔的領土，如克里米亞等，又威脅唔再提供軍火支援，根本就係逼烏克蘭打輸仗。
特朗普政府上任後，亦已經封殺了唔少稍為左派一點的傳媒。你可以話呢班左派傳媒「抵死」，但現在發展的情況是，仍然有機會近距離採訪政府相關新聞，變成與中共黨媒一樣，日日幫手宣傳假新聞。例如最近係咁收關稅，仍然有大量白痴侵粉以為美國賺咗一大筆錢。因為這些仍有機會採訪特朗普的傳媒，向外宣稱特朗普提到從關稅中獲得20億美元。最好笑嘅係，美國海關與邊境保護局（CBP）與財政部的數據都自爆真實情況。自2025年2月重新實施新關稅以來，平均每日關稅收入約為2.63億美元，遠低於特朗普聲稱嘅20億美元，仲未計關稅最終由美國消費者俾番嘅經濟傷害。侵侵老死Elon Musk成立DOGE部門，當時都係咁向外吹噓慳咗幾多幾多錢，但已經多次被人揭發造假數的問題。侵粉當然唔會睇，就算睇到就只係會大叫「左膠」、「假新聞」。
一講到呢度，啲人就會話，「咁你即係幫住中國啦，仲唔捉到你奶共！」。小編心諗你唔好咁白痴啦，佢當初話加到中國超過200%關稅，小編都唔知幾高興，點知今日就即時放軟手腳，你話真係激唔激氣。你可以話又捉一盤大棋，但事實係而家俾全世界睇到，特朗普嘅軟弱，同埋美國究竟有幾信唔過。若果你係其他國家，呢一刻係咪諗過做乜要咁早同美國傾？美國會否自毁多年建立的形象，唔係特朗普出黎話「我地好強」，人地就會信。原本以為，特朗普大玩個人崇拜、散播假新聞都算了，只要對中國強硬小編都滿足，但結果咁快就向中國示好，真係好樣衰。你可能又會話，「咁佢降咗未呀？」。你咪咁弱智，佢而家唔降都唔得，因為你要所有嘢搬番去美國製造，唔係幾個月就搞得掂，特朗普要硬都唔得，因為而家係美國連右派都有人出聲唔滿意關稅。失望位係，特朗普一啲都無堅持耐啲，咁快就輸俾習近平睇。
特朗普上場後，製造無謂的混亂多過有任何實際功績。美國人無知、又或者純愛國，死撐特朗普都算。最笑死人嘅係，有一大班香港人仍然盲目死撐。呢班低能無常識的侵粉，死都唔肯承認自己撐錯人，因為香港人就係最鐘意標籤，鐘意郁啲就話人「左膠」，唔撐特朗普就係「奶共」，永遠都係一定要左右清晰分界。就算特朗普發展到而家玩個人崇拜，講到出口話要做第三任總統，不停散播假新聞，與中國共產黨幾乎一模一樣嘅時候，都因為固有的「特朗普=奶共」形象就一定要撐。令人作嘔嘅係，有啲所謂香港YouTuber，逢侵必撐，唔講道理唔講事實都唔緊要，但而家咁樣又降番關稅咁點呢？既然係咁，咁當年梁振英曾公開譴責中共就64的行為，咁唔通當佢係同路人？近嘅講番林景楠當年都好支持反送中，而家變成咁，大家仲會唔會撐佢？
（配圖由AI所生成）
