香港人大部份唔肯環保其中一個原因  就係因為煩膠太煩

0

之前出咗有篇文,提到香港飲熱嘢凍嘢用飲管都要管,然後被環保人無限上綱上線,有人夾硬屈我地反環保,有人仲屈我地鼓勵用膠飲管,更有人離譜到老作老屈話我地反鐵飲管有得益,完全係黐左線一樣。講最後一次,我地唔想圍繞環保呢個題目再講咁多,因為講到我地都覺煩,但因為太多所謂環保人走黎踩場搞搞陣,不停強加自己想法去人地度,所以要講最後最後一次。

1. 內文從來都無建議任何環保方案,「唔食唔去痾唔郁唔產生能量唔好工作」﹐根本傻嘅都睇到無可能,盲嘅都知講笑。

2. 成篇文重心係叫大家唔好再成咁煩膠,從來都無反環保。我地係Facebook都講明,根本你飲凍嘢做乜要用飲管,唔用其實係最好,無必要夾硬強逼人地飲熱嘢。

3. 我地絕對認同帶頭減廢,同埋減廢柴(呢部份講笑嫁,睇唔睇能得明呀),內文邊忽叫你亂咁浪費?叫你喪用膠飲管?叫你亂用紙巾?

4. 你地環保人無權夾硬要人做你做緊嘅嘢,更加無理由用如此離曬譜的態度,係度不停用你嘅方式去不停(我地講緊係不停呀)指責人地,不停留言洗版。

等如外國有個鬼佬返回原始生活,佢唔會日日係你Facebook留言,同你講:喂,你不如同我一樣全裸係森林生活啦,鑽番木取個火。

5. 唔好同我講乜嘢言論自由,我地啱啱刪除的留言,係多到Facebook自動把其刪除。你可以留言話用飲管傷殘,但唔係留言留到連個Facebook都當係SPAM,咁你話邊個過份啲。

呢一PART唔係講笑:winandmac小編或者唔係最環保嘅人,但會盡量減少生產廢物,但從來唔會寫篇文或留個言炫耀拎光環。訓覺從來唔會開冷氣過夜,返公司前真係上身赤裸(因為太熱)。係屋企真係永遠都係全裸,因為小編覺得無需要係屋企衫一套,出街又一套。出街先著番條褲,到公司門口前先著番件衫。著多套衫就要洗多套嘢,都係浪費水。

但我唔會走去人地Facebook留言,更唔會係街度同人講:你咁熱不如除咗件衫佢啦,用毛巾或紙巾抹汗好唔環保呀!

亦唔會走去同人講:我唔准你開冷氣訓覺呀,太唔環保啦!

亦唔會去你屋企講:你做乜著另外一套屋企衫,不如學我咁全裸咪幾好!環保啲呀。

點解香港咁少人肯去為環保出一份力?就係因為煩膠呀,明唔明呀?要人環保唔係夾硬去逼人呀,識唔識呀?最好方法係令人覺得環保係好玩有趣容易做嘅嘢,而唔係成日用你自己既定一套想法,去強逼人地去做呀!

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More