阿鬼
無論點講，《飢餓遊戲》已經是近年難得一見的巨片，因原著好賣而食正自由民主這類普世價值，拍到幾集而每次都鋪天蓋地宣傳及多版本同時上映，票房一定有保證。如果你有睇之前三集，去到最後一集就唔會唔睇，不過我睇完後，終於慶幸它終於完了，我也自由了！
寫《飢餓遊戲終極篇：自由幻夢2》這篇影評時，已有人入場看過之後覺得拖覺得悶，是的，前半段的確是文戲較多，鋪排的時間過長，尤其是講到女主角要去刺殺總統Snow的那一段，其實可以大大縮短直接去到動作位，感覺應該會爽快得多。而到了全片所在的高潮位，甚至可以稱之為幾集以來的終極一戰，筆者覺得部分場面構思不錯，但作為壓場就未夠班，最後最後的情節更有草草收場的感覺，可說是令人有點失望。
當然，有睇過原著的朋友，或會指出其實都是跟足原著拍，不能怪導演Francis Lawrence，但小記想講電影與小說始終是不同的，拍成電影時一定要考慮娛樂性，而且入場的觀眾很多都未必有睇過原著，如果原著有些不適合拍戲但又跟到十足十，反而令整套影片失色。《飢餓遊戲終極篇：自由幻夢2》似乎就犯了這個毛病，當大家看了海報上的Jennifer Lawrence射晒箭背後出曬火，一定抱很大期望入場，當中的落差難免會令到大家的評價不一。
講到文戲比較多，不得不提Jennifer Lawrence的演技真的愈來愈見進步，有幾場內心戲也演繹得有紋有路，只是其他對手的演技相對較弱，又或者是太多角色根本未及發揮，以至Jennifer Lawrence一個演得好也難擦出火花。唯一比較有睇頭的是Donald Sutherland及Julianne Moore兩大老戲骨，那種政治上的老練及狠辣，為這套戲拉高了不少分數。其他的角色實在出得太多太快，即使Josh Hutcherson的Peeta都好像陪跑似的，有些浪費！如果要一句評價《飢餓遊戲終極篇：自由幻夢2》，就是「雞肋」：睇之無味、棄之可惜！
[youtube url=”https://youtu.be/H8fgZFfpIAg”]
